"Sumar á Sýrlandi" - Gleðilegan dag!

Örlagaríkt samband mitt við Hafnarfjarðarbæ náði vonandi hámarki sínu í dag. Þar hélt ég daginn hátíðlegan með fullu húsi stiga. Blómamessa í Víðistaðakirkju. Skrúðganga í lögreglu og skátafylgd undir "Öxar við ána" niður á Thorsplan. Fjölskylduskemmtun með öllu tilheyrandi í brakandi blíðu.

Meðan hún Sunna mín lék lausum hala í húlahoppi og tilheyrandi, sat amma á veggkanti og snéri nefinu upp í sólina. Hef aldrei tekið eftir því hve Hafnfirðingar eru annars upp til hópa myndarlegt fólk.

Hugur reikar um víðan völl meðan skemmtiatriðin á nýja sviðinu renna ljúflega. Kór Flensborgarskóla syngur fagurlega undir öruggri stjórn kórstjórans. Íþróttafulltrúinn hafði minnst á forvarnargildi íþróttanna og gaf skátunum góða einkunn. Í skátunum læra krakkarnir innri aga og virðingu fyrir góðum gildum. Held að hann hafi nokkuð til síns máls. Samvistir við foreldra eru alltaf besta meðalið þótt foreldrar séu ekki beint allir með skáta og íþróttaandann við höndina.

Ég verð sjálf reyndar stundum þreytt á þessu eilífa íþróttatali. Margt er gott við þær en munum að til eru krakkar sem ekki njóta sín þar. Það væri gaman að heyra æskulýðsfulltrúa tala um íþróttir og listir í sama mund t.d.

Leikfélag Hafnarfjarðar slúttaði skemmtuninni með líflegu atriði úr barnaleikritinu sínu.

Þakka Sunnu minni fyrir skemmtilegan dag og sólinni fyrir að skína. Óska okkur öllum

GLEÐILEGS SUMARS.