"Goddi", góður og ekta.

Systur minni fannst hún orðin n.k. grúppía fyrir þáttinn Návígi á RUV á facebook síðunni sinni, þegar hún mærði bæði stjórnanda og viðmælendur í tvígang. Um var að ræða viðtalið við Pál Skúlason og "Godda". Ég get tekið undir með henni.

Það er mikið gott að heyrist hátt í mönnum eins og þeim þessa dagana. Páll er vel máli farinn hugsuður og heimspekingur, sem nær að setja umræðuna á eðlilegt og vitrænt plan. Hann kann  auðvitað öll "trikkin í bókinni" (á óvandaðri íslensku) ... aðferðafræði vandaðrar umræðu, sem við þurfum öll að læra og tileinka okkur.

"Godda", þennan ágæta mann sem var viðmælandi Þórhalls í gærkveldi, þekki ég ekki persónulega en mér fannst gott að fá þessa sýn hans sem innlegg í þá umræðu er hæst mun bera á næstu vikum.  Umræðuna um það hver við erum sem þjóð.

Útskýringar hans á því hvernig  myndmálið læsist í okkur ósjálfrátt  var afar áhugaverð og í rauninni nauðsynlegt að skilja og skynja.

Rakti hann sögu, skjaldarmerkis okkar, fjallkonu, fána og Alþingishúss m.a. Lýsti því hvernig þessi merki hafa inngreypst í hugi okkar og verið hluti af sjálfsmynd okkar sem þjóðar... og kannski okkar eigin sjálfsmynd sem einstaklingar og hluti af þjóð....

Þótt  íslenska fjallkonan eigi sér fyrirmynd í annarri gyðju (eða öðrum gyðjum öllu heldur), þá skiptir það einhvern vegin ekki öllu máli fyrir mig. Mér þykir hún jafn falleg táknmynd engu að síður.

Mér finnst hins vegar mjög gott að skilja þetta samhengi hlutanna og sjá það í víðara samhengi.

Tel ég mikilvægt einmitt á þessum tímapunkti að við lærum að skilja þetta samhengi allt og ekki síst hin nýja kynslóð sem taka mun við.

Ég deili áhyggum af ofurtrú á "guðinn" exel.

Sannarlega er náttúran ekta, þau tengsli endurnýjaði ég með afgerandi hætti í sumar við jurtatínslu. Það er óendanlega dýrðlegt að vera í skínandi sumarólinni í móa umlukinn jurtaflóru, fossnið og fuglasögn. Svo ekki sé talað um að læra hvaða jurt er hvað og til hvers hún er nýtileg.

Já það er ekta... eins og "Goddi" sjálfur, lopapeysan og slátirð... þangað sem við leitum til að reyna að skilja okkur sjálf sem einstaklinga og þjóð.

Holtasóley. Þjóðarblóm Íslands.